Sada incrementa un 34,9% o investimento con recursos propios

O Concello de Sada incrementará este ano en máis dun terzo os recursos propios destinados a investimento, que no Orzamento de 2012 que o próximo día 28 será sometido a debate e aprobación no Pleno aumentan un 34,9%, para alcanzar os 401.485,82 euros, fronte aos 297.676,40 euros consignados o ano pasado.

Mediante este aumento dos recursos propios destinados a investimento o Goberno Local pretende paliar a redución do financiamento externo que Sada, do mesmo xeito que a práctica totalidade dos municipios españois, experimentará este ano debido á crise económica.

Este esforzo investidor do Concello posibilitará acometer a reforma da Casa da Cultura e a creación da Biblioteca Infantil.