Reabre o pavillón polideportivo unha vez rematadas as obras na cuberta

05/10/2017

Reabre o pavillón polideportivo unha vez rematadas as obras na cuberta

Os traballos solucionan o problema das pingueiras, que limitaban o uso do recinto polideportivo.

Durante este mes comezarán todas as Escolas Deportivas que este ano contan con catro novas disciplinas multideporte, baloncesto, patinaxe artística e voleibol.


Sada 5 outubro 2017

As pingueiras do pavillón polideportivo de Sada, restrinxían o seu uso para a actividade deportiva e durante este verán optouse polo cambio do lucernario, uns traballos que xa finalizaron e que permiten arrincar esta semana as actividades das Escolas Deportivas Municipais nesta instalación.

A corrosión nos elementos de suxeición do lucernario dun inmoble que ten xa tres décadas obrigou a realizar uns traballos que supuxeron un investimento de 20.865 euros e que se desenvolveron o mes pasado, para non interferir cos meses de máis uso da instalación.

Ampliación de espazos

Aínda que no pavillón realizáronse obras de remodelación con anterioridade, segundo recoñeceu a concelleira de Deportes, Zeltia García, estas non solucionaran os problemas de impermeabilización, o que levaba unha deterioración da instalación, ademais de limitar o seu uso. "Era unha obra necesaria, porque Sada precisa un lugar que poda acoller competicións e que non quede supeditado a que ese día non choia", explicaba a edila.

No último ano e a modo de complemento do recinto das Brañas, o Concello conseguiu a cesión do polideportivo do instituto Isaac Díaz Pardo e do albergue da Marina. Optouse por esta opción debido ao incremento da oferta e a demanda, o que fixo que este ano as Escolas Deportivas, que teñen como obxectivo promover e fomentar a actividade física, conten con catro novas modalidades: multideporte, impartido por Hebe Sport; baloncesto, do que se encarga o Clube Golfiños de Sada; patinaxe artística, impartido polo Club Patinaxe Artística de Sada e voleibol, por parte do Club Deportivo Padre Faustino.

Arquivado en:
Alcaldía. Novas. Sada. Deportes.

Temas:
Deporte. Obras e servizos.

Perfís:
Xuventude. Maiores.

AXENDA